TUTTO BENE – TURNFAHRT 2023
Agfange hed unses Abentür z Gelti am Bahnhof am viertel vor 7ni. In gueder TV-Maniere sin natürlich alli scho am 6:40 parat gstande, inkulsive Gian. Mit dr Abfahrt vom Zug isch es ersts Rätsel uf unseri Aktivriegi zuecho, es hed müese usegfunde werde, wo dass es als nächsts ahnegod. Nach churzem Überlegge isch s Ziel gfunde worde. Es Buech mit verstecktem Schlüssel hed denne dr nächst Hiwiis geh und d Truppe hed sich folgend uf e Weg nach Luzern gmachd, mit em ne durchdachte Chrüzworträtsel in dr Hand. Um die langi Wartezit in dr Turistemetropole nid z verschwände, hei unseri liebe Reiseleiter Günti und Manu d UNO Reverse Charte uspackt. Jetzt heds gheisse asiatischi Touris abfötele. Heisst, dr Spiess einisch umdreie. Nach villne lustige Begegnige und zwüschezitlichi mexikanische Tanzilage macht sich d Truppe uf e Weg zur finale Destination. S Ziel vom Tag: Bellinzona. Am Zielort acho isch dr Plan vom Tag denne verkündet worde: E Burgrundtour. Aso hemmer uns uf e Weg gmacht und in Begleitig vom BIG JOHN die erste zwei Burge abklappered. Vo dört ah hei sich unseri Gedanke in richtig Zmittag verstärkt und unsere Weg zum Rastplatz kehrt. Trotz regnerische Konditione ischs unsem Naturbursch Clemens glunge es stattlichs Füür azfache. Heisst für uns, feini Würst und durnigs Hüendli. Nach dere sättigende und erholsame Pause isch dr Weg zu unsere Unterkunft bestritte worde.
Acho in dr Jugendherberge Bellinzona hed sich d Aktivriegi für die letschdi Burg parat gmachd. Nach em ne exquisite Apero im Burgturm inklusive Gralsred, isch dr letschdi offizielli Stop vom Tag s Restaurant gsi. Schnell isch klar worde, dass e Apero so kurz vor em Znachd nid die besti Idee isch. Mit dene riise Portione hei e paar no z kämpfe gha aber so gued wie de Risotto und de gmischti Salat gsi isch, heis die allermeiste no gschafft. Zur Abrundig vo dem ganze Esse heds zum Dessert no es Sorbet geh. Vo do ah heds agfange mit em eigeständige Programm. So simmer also ind Altstadt go luege, was es do so gid. Hed sich leider usegstellt, dass sich nid vill mehr als 5 lüt am ne Samstig obe in de Strosse vo Bellinzona umetribe. Schlussendlich isch denn doch no e Bar gfunde und d Nullerrundi iglütte worde. Churz drnoch hed d Entdeckig vonere Karaokebar d Rundi gmachd und so sin alli Schöfli schlussendlich au dört glandet. Enttüschenderwis hed sich de Schuppe nid chöne Spotify Premium leiste, wodurch sich d Musig immer wider mol durch e Werbig pausiert hed. E guede Obe hei mer trotzdem gha und nachdem sich die Ältischde im Bund uf e Weg ins Bett gmachd hei, hed dr Spass erst richtig agfange. Karaoke isch agseid gsi! Nach lange dutzend italienische Lieder hemmer denne au mol selber Hand ans Mikrofon gleid und It’s my life vom Bon Jovi zum Beste geh. Das ganze hed sich denne au no gued ind Nacht inezoge, bis denne die Letschde au ihre Platz im Bett gfunde hei.
Am nächste Morge hed dr ersti Treffpunkt 9:00 Uhr vorusse gheisse. Vo dört ah an Bahnhof und uf e Zug nach Luzern zrugg. Nach dere Rückkehr isch emol wider an dr Zit gsi uns z stärke. Nach em Esse, inklusive ere Pause am See ischs denne witer gange. Immer no gspannt uf d Endstation simmer los. Nach einehalb Stunde simmer den au scho acho, nämlich bi dr Paintball Arena Luzern in Emme. Die teilwis dämpfti Stimmig wärend em laufe isch jetzt uf em ne all time high gsi und d Vorfreud riisig. E Stund lang heds denne gheisse 7v7, bis eis Team usgschalte isch. Nid schmerzlos aber voller Elan sin die 14 Chrieger ind Schlacht und hei sich in verschiedene Teams duelliert. Am Endi alli duregschwitzt und mit gäle Sogge, simmer zfride und mit luter Abdrück under d Duschi. Vo dört ah isch denne nume no dr Heimweg vor uns gläge. Au de isch in heiterer Stimmig und mit paar guede Runde Tutto absolviert worde. Erfüllt vo dene Erlebnis simmer alli heil z Gelti acho. Viele Dank Manu und Günti fürd Orga!
Alle Fotos findet ihr hier und da der Bericht.
